මහතුනි මදක් නවතින්න.

නුවර එළිය - හැටන් මාර්ගයේ ශාන්ත ක්ලෙයාර් ඇල්ල ඉදිරිපිට
මැදිවිය ඉක්මවූ පුද්ගලයෙක් දිය ඇල්ලේ සිතුවම් ඇද අලෙවි කරයි.

මහතුනි මදක් නවතින්න
අන්න අර කන්දෙන් පහළට
ගලන්නේ ජීවිතය,
සල්ලි කොළ කිහිපයක් අරගෙන

නාය යන ජීවිතය
බර වැඩි හෙයින් දෑතට
වෙව්ලීම් තිබුණත් නිතරම
පිංසල් පහර තරුණයි තවම

ඉරටු අමුණා එකිනෙක
දී නෙක වර්ණ
සිත්තම් කළත් ඒ මත
ඉර මට දුන්නෙ කළු පාට

ඒ කළු පැහැය උඩ
නෙක නෙක වර්ණ තවරන
බිරිඳ දරුවන් එක්කම
අමිල වූ සිතුවමක්   
හදවතහි ඇදී ඇත
එතැන,
ජීවිතය ඇරඹෙන තැන

එහෙත් මහතුනි,
මේවා ඇත ලාබෙට
එකක් අරගෙන යන්න
පුංචි මිල සිතුවමක්.