සිරිසේන.

දවස පුරාම
ගල් මෝලෙ ගල් කඩන
ගල් උස්සන
ගල් හිතක් තියනවයි කියන
ගල් වලේම උපන් සිරිසේන
හැමදාම හවසට
ඇගපත ඩිංගක් රත් කර ගන්න
හිස් ගල් බෝතලයකුත් ඉණේ ගහගෙන
මූකළන් වත්තට බඩගාන ගොහින්
ආපසු එන්නේය
බෝතලය අඩක් පුරවාන

ගොම්මන් කළුවර එනතුරු
බලාගෙන
ගොම්මන් කළුවරත් එක්ක
හිඳගෙන
හිස් කරන්නේය හේ
බෝතලය

ඉතිරි කාසි කොළ විපරම් කර
අතක ගුලි කරගෙන
හෙමිහිට
සිහිකරන්නේය දරුවන්
සිහිකරන්නේය බිරිඳ

හන්දියේ කඩපිලට
ගොඩවැදී අතරමග
නිතරම බලා
පිසූ ආහර දෙස
මිලට ගන්නේය ඔහු
ආප්ප-කොත්තු
රෝල්ස්-පැටිස්
කාසි කොළ හිස්කර

දරුවන් ගැන වචනයක්
දෙකක්
තුනක්..
බිරිද ගැන වචනයක්
දෙකක්
තුනක්..
අල්ලාප සල්ළාපයෙහි යෙදී
රෑ දෙගොඩහරිය දී
පිටත්වන්නේය ඔහු
නිවසට

කුස පුරවාගෙන දහවල් යාන්තමට
රාත්‍රී රස බොජුන් බලා හිඳ
නිදන්නේය දරුවන්.
හූල්ලනු ඇසේ බිරිඳ
වේවැල් කැඩුණු පුටුවක හිඳ

ගොඩවදින සිරිසේන නිවසට
සිනාමුසු මුහුණින්
තබා රජ බොජුන් බිරිඳ පාමුල
වැටෙන්නේය නින්දට.

ගෝල් ෆේස්.

අරන් එන්න එක පොප් කෝන් ගොටුවක්
පුංචි රුපියල් විස්සකට
අන්න අර පේන බංකුවේ ඉඳගෙන
එකින් එක අහුලන්න

පේනවද අර මුහුඳ
දුවගෙන එන රැල්ල,
වෙරළ සිප වැළඳගන්න

සුළග එක්ක යන්න හදන සරුංගලය
පොඩි එකාට රවනවා නේද
නූලක ගැටගසා රඳවා ගත්තාට

මුහුදෙන් ගොඩට ආපු ඉස්සො රංචුවක්
තෙලෙන් නාලා සැරසීගෙන
උදර කුහරයකට රිංගන්න බලාගෙන

කොල්ලන්ගෙ අත ඉන්න
අයිස් ක්‍රීම් ගොටු වලට
ඉන්න බැරුවම එක විදිහකට
පෙරි පෙරී බිමටම

පහන් කණුවක සෙවනැල්ල
තවත් පහන් කණුවක් අල්ලන්න සුදානම
තව වෙලා තියනවා දැල්වෙන්න
හැකියි තව ටිකකින් ළං වෙන්න

හොදටෝම දැනෙනවා ඇති රස්නය
කෙරවලක පඩියක් උඩ
තටු ගහන කුඩයක් යට
ගුලි වෙච්ච පෙම් යුවලට

තල්මසුන් ඉන්නවද නැව යට
පිට කසා ගන්න රැස්වෙන
කුරුල්ලන් කැමතිද
නැවත් එක්ක ඉගිලෙන්න

පොළවටත් පුලුවන් නේද
අහස ළගටම යන්න
ඈත කෙළවරක පේනවද
අහස - පොළව එකට.??

අම්මා නැතිවුණා සර්.

හෙට උදේම ගමේ යනවා
සඳුදා නෑ තමයි එතකොට
යන්නම එක දවසක්
අනිද්දාට එන්න බෑනෙ

මැෂිමේ පාදයට
රෙදි කැබල්ලක් තබන අතරතුරම
හිනැහුනා ඇය.
මා දෙස යටැසින් බලා
නැවතත් සිනාවිය
ජීවිතය එක්ක
මැෂිමත් සමග මැහෙන.

'' හඃ
හදිසියෙම !
කල වයස වයස නොවැ
මනමාලයෙක්වත් එනවද?''
හිනැහුනා මම
හිනැහුනා ඇය.

මොහොතක්ය ගතවුණු.
ඈ අඬන්නිය
මැෂිමට කඳුළු හෙලන්නිය.

''අම්ම නැතිවුණා සර් ගියමාසෙ
හත් දවස දුන්න ගමන්
මම ආයෙ වැඩට ආවා
රස්සාව වටිනවා.

සිල්ලර හොයන්නිය
ගෙදර බර දන්නීය ඇය
හඬන්නීය
ජීවිතය මහන්නීය.